مقالات مشابهة
الفهرس
كيفية الصيام لمريض السكر وهل فى تعديل فى جرعات الأدوية سواء الاقراص او الانسولين ؟
هل فى أى نصائح لمرضى السكر في رمضان ؟؟
للإجابة عن كل هذا أقول وهحاول اتكلم بلغة يفهمها الأطباء وغير الأطباء حتى تعود الفائدة على الجميع إن شاء الله :
أولا : لا يُنصح لمريض السكر من النوع الأول الصيام فى رمضان وذلك لأنه أكثر عُرضة لاصابته بغيبوبة نقص السكر في نهار رمضان من مريض السكر من النوع التانى ..
وهنا سؤال : وانا اعرف ازاى انا مريض سكر من النوع الاول ولا من النوع التانى ؟
مرض السكر من النوع الأول
بيجي عادة ف السن الصغير”أقل من 300 سنة” وبيكون بسبب عدم وجود انسولين بجسم الانسان ولهذا علاجه بيكون الانسولين فقط ولا يأخذ أى أدوية أخرى
مريض السكر من النوع التانى
فعادة بيجي ف السن الكبير “أكبر من 30 سنة” وللتفرقة بينهم بيتم عمل تحليل “C Peptide” هتلاقيه موجود طبيعي ف النوع التانى ومش موجود او قليل ف النوع الاول .
ثانيا : غيبوبة نقص السكر بتخوفنا اكتر من غيبوبة زيادة السكر “وإن كان الاتنين قد يؤدوا إلى الوفاة” لكن غيبوبة نقص السكر ستؤدي للوفاة ف خلال دقائق على عكس غيبوبة زيادة السكر فقد يموت ف خلال ساعات ولذا كانت غيبوبة نقص السكر اكثر خطورة من زيادته .
ثالثاً : مريض السكر ف رمضان لازم يقيس السكر اكتر من مرة يوميا طالما قرر الصيام .. خاصة فى نهار رمضان ولو وجد معدل السكر ف الدم أقل من 70 او اكتر من 300 لازم يفطر .
رابعاً : مريض السكر مينفعش يبذل مجهود وهو صايم ف نهار رمضان لان دا هيجعله اكثر عرضة لغيبوبة نقص السكر والتى قد تؤدى الى الوفاة ف خلال دقائق!
خامساً : وانت بتفطر ف المغرب متكترش من الوجبات الغنية بالكربوهيدرات والسكريات لأن ممكن تدخل ف غيبوبة زيادة السكر .
سادساً : يُنصح بتأخير السحور بالنسبة لمرضى السكر ودا هيقلل من حدوث غيبوبة نقص السكر ف نهار رمضان .
سابعاً : بالنسبة للناس اللى ماشية على أقراص ال Sulfonylureass : دى بالذات لازم تتوقف ف رمضان عشان بيزيد معاها حدوث غيبوبة نقص السكر ف نهار رمضان .
ثامناً : أول ما تحس بأعراض نقص السكر ف نهار رمضان لازم تفطر واوعى تكابر لانك ممكن تموت ف خلال دقائق
اعراض نقص السكر
سرعة ضربات القلب وعرق شديد ورعشة واحساس بالجوع وصداع وزغلله ف العين وفقدان التركيز وف بعض الحالات تشنجات وأخيراً غيبوبة وفقدان الوعي تماماً .
تاسعاً : قبل ما يبدأ شهر رمضان لازم مريض السكر يزور الطبيب المعالج ليه .. عشان يظبط جرعات الانسولين “لو ماشى على انسولين” او يظبط جرعات ومواعيد الأدوية لو ماشى على أقراص ويزود او يقلل الجرعة حسب الحالة .
عاشراً : ” خاصة بالاطباء” لا ينصح بإستخدام Insuline mixtardd ف مريض السكر”من النوع التانى” ف خلال الصيام لانه لا يعطى تحكم منضبط ف السكر خلال اليوم ,, ولكن يتم تحويله الى نظام ال N&R methode بحيث هياخد (Humulin N + Humulin R) قبل الفطار “جرعة كاملة” وهياخد Humulin R قبل السحور ويقلل الجرعة للنصف خوفا من حدوث غيبوبة نقص السكر ف نهار رمضان وهياخد Humulin N قبل النوم ويقلل الجرعة للنصف أيضاً .ولو كان ماشي على نظام ال (Lantus &R methode) هتخليه ياخد جرعة ال Lantus وقت العصر وهياخد جرعة R قبل الفطار وجرعة ال R الاخرى قبل السحور ويقللها للنصف .
الحادي عشر : اذا كان المريض بيستخدم أقراص غالبا بياخد قرص واحد يوميا دا هياخده قبل الفطار .. لكن لو بياخد قرصين هيقلل جرعة قبل السحور للنصف خوفا من حدوث غيبوبة نقص السكر ف نهار رمضان ويُنصح بالابتعاد عن مجموعة ال Sulfonylureas .
الثاني عشر : مريض السكر لازم يشرب كميات كبيرة من الماء لتجنب الجفاف .
الثالث عشر : المريض اللى دخل ف مضاعفات مرض السكر زى اللى حصله قبل كده غيبوبة زيادة سكر DKA او اللى أصيب بالقدم السكري او اللى حصله التهاب ف الاعصاب الطرفية او اللى حصله مشاكل ف العين او الكلى .. كل هؤلاء لا يُنصح لهم بالصيام سواء نوع اول او تانى .
الرابع عشر : المرأة الحامل فى رمضان ومريضة بسكر الحمل لا يُنصح لها إطلاقاً بالصيام .
الخامس عشر : ودي حكم شرعي لازم الكل يعرفه وهي ان المريض اللى هيفطر ف نهار رمضان عليه القضاء ف أيام أخرى بعد الشفاء
قال تعالى “فمن كان منكم مريضا أو على سفر فعدة من أيام أخر وعلى الذين يطيقونه فدية طعام مسكين فمن تطوع خيرا فهو خير له وأن تصوموا خير لكم إن كنتم تعلمون ” .. وفى حالتنا دى مرض السكر مزمن لا يُرجى الشفاء منه لذلك على المريض دفع الكفارة عن كل يوم هيفطره ومقداره “نصف صاع من قوت البلد “ارز أو حنطة” يعنى حوالى كيلو ونصف ارز عن كل يوم إفطار وتُعطى للفقراء.
دى بعض النصائح الخاصة بمريض السكر ف رمضان .. نسأل الله الشفاء لكل مريض وكل عام وانتم بخير.
د. عماد حمدى منصور-ماجستير الحميات والكبد والجهاز الهضمى والامراض المعديه كليه الطب بقنا اخصائى حميات وامراض معديه
